စတာရစ်ခ်ျနေရာတွင် ဝင်ရောက်ကစားရန်အသင့်ရှိဟု လီဗာပူးတိုက်စစ်မှူး အိုရီဂီပြောကြား

ယူရိုပါလိဂ်ပွဲကြိုသတင်းစာရှင်းလင်းပွဲတွင်တွေ့ရသည့် အိုရီဂီ

တနင်္ဂနွေနေ့က ယှဉ်ပြိုင်ခဲ့သည့် နယူးကာဆယ်နှင့်လီဗာပူးပွဲစဉ်တွင် တိုက်စစ်မှူးစတားရစ်ခ်ျဒဏ်ရာရရှိခဲ့ရာ အိုရီဂီအနေဖြင့် ယူရိုပါလိဂ်ပွဲစဉ်တွင် အဓိကတိုက်စစ်မှူးအဖြစ် ပွဲထွက်ခွင့်ရဖွယ်ရှိသည်။

လီဗာပူးအသင်းသို့ ပေါင် ၉ သန်းဖြင့်ရောက်ရှိလာသည့် အသက် ၂၀ အရွယ် ဘယ်လ်ဂျီယံတိုက်စစ်မှူးအိုရီဂီသည် ပြီးခဲ့သည့် ကပ်ပီတယ်ဝမ်းဖလား ကွာတားဖိုင်နယ်ပွဲစဉ်တွင် ခြေစွမ်းပြကာ ဆောက်သမ်တန်ဘက်သို့ ဟက်ထရစ်သွင်းယူနိုင်ခဲ့သည်။

လီဗာပူးတိုက်စစ်မှူးတစ်ဦးဖြစ်သည့် ဘန်တီကီမှာလည်း ပုံမှန်ခြေစွမ်းအောက်ရောက်နေသောကြောင့် ယနေ့ညယှဉ်ပြိုင်မည့် ဆီယွန်နှင့်ပွဲစဉ်တွင် အိုရီဂီမှာ လီဗာပူးတိုက်စစ်ကိုဦးဆောင်ရန် အခွင့်အရေးများလျက်ရှိသည်။

ယူရိုပါလိဂ်ပွဲစဉ်နှင့်ပတ်သက်ပြီး အိုရီဂီက “ပွဲထွက်ကစားခွင့်ရရင် ကျွန်တော်အရမ်းပျော်ရွှင်စိတ်လှုပ်ရှားမိမှာပါ။ အသင်းအတွက် အစွမ်းကုန်ပေးဆပ်ဖို့အသင့်ဖြစ်နေပါပြီ။ နယူးကာဆယ်နဲ့ နောက်ဆုံးပွဲစဉ်မှာလည်း အကောင်းဆုံးခြေစွမ်းပြသနိုင်ခဲ့ပါတယ်။ ကျွန်တော့်အနေနဲ့ တစ်ခါတစ်လေခြေစွမ်းမပြနိုင်တဲ့ပွဲတွေရှိမယ်။ ဒါပေမဲ့ ကျွန်တော်ကတော့ အကောင်းဆုံး လေ့ကျင့်ပေးဆပ်ပြီး နည်းပြရဲ့ ပွဲထွက်ခွင့်အဆုံးအဖြတ်ကို စောင့်မှာပါ”ဟု ပြောကြားခဲ့သည်။