မြန်မာနိုင်ငံဘောလုံးအဖွဲ့ချုပ်အား သမိုင်းတစ်လျှောက် ပထမဆုံးအကြိမ်အဖြစ် ဆန္ဒမဲများဖြင့် ပြန်လည်ဖွဲ့စည်း

Share on Facebook0Tweet about this on TwitterShare on Google+0Share on Reddit0
12063538_605904349548381_6719546451037486118_n
မြန်မာနိုင်ငံဘောလုံးအဖွဲ့ချုပ်ညီလာခံကျင်းပနေစဉ်

ရန်ကုန်၊စက်တင်ဘာ ၂၆။
အောင်သော်ဖြိုး။

မြန်မာနိုင်ငံဘောလုံးအဖွဲ့ချုပ် သမိုင်းတစ်လျှောက် ပထမဆုံးအကြိမ်အဖြစ် ဆန္ဒမဲများဖြင့် ရွေးချယ်တင်မြှောက်ခဲ့သည့် ပထမအကြိမ် မြန်မာနိုင်ငံဘောလုံးအဖွဲ့ချုပ်ညီလာခံကို စက်တင်ဘာလ ၂၆ရက် ရန်ကုန်မြို့ နိုဗိုတယ်ဟိုတယ်တွင် ကျင်းပကာ ပြန်လည်ဖွဲ့စည်းခဲ့ပြီး ရွေးချယ်တင်မြှောက်ခံရသူများသည် ၂ဝ၁၅ မှ ၂ဝ၁၉ ခုနှစ်အထိ တာဝန်ယူဆောင်ရွက်သွားမည်ဖြစ်သည်။

ပြန်လည်ဖွဲ့စည်းခဲ့သည့် မြန်မာနိုင်ငံဘောလုံးအဖွဲ့ချုပ် ဥက္ကဌရာထူးကို လက်ရှိဥက္ကဌ ဦးဇော်ဇော်ပင် ပြန်လည်ရွေးချယ်ခံခဲ့ရပြီး ဒုဥက္ကဌများအဖြစ် ရန်ကုန်အသင်းပိုင်ရှင် ဦးပြည့်ဖြိုးတေဇ နှင့် ရတနာပုံအသင်းပိုင်ရှင် ဒေါက်တာစိုင်းဆမ်ထွန်းတို့က တာဝန်ယူဆောင်ရွက်မည်ဖြစ်သည်။

မြန်မာနိုင်ငံဘောလုံးအဖွဲ့ချုပ် မှ ပြည်ထောင်စုဝန်ကြီးဌာန ကိုယ်စားလှယ်များကိုလည်း ရွေးချယ်ခဲ့ပြီး အားကစားဝန်ကြီးဌာနအတွက် ဦးကျော်ဆန်း၊ ပညာရေးဝန်ကြီးဌာန ဦးမျိုးသိန်း၊ ကျန်းမာရေးဝန်ကြီးဌာန ဦးအေးကိုကိုတို့ကို ရွေးချယ်ခဲ့သည်။

အထက်မြန်မာပြည် ကိုယ်စားလှယ်လောင်း ၂ ဦးအဖြစ် ဦးစိန်ဝင်းကြီး (မန္တလေးတိုင်းဒေသကြီး ဘောလုံးဆပ်ကော်မတီ)နှင့် ဦးခင်မောင်သန်း (ရှမ်းပြည်နယ်ဘောလုံးဆပ်ကော်မတီ) တို့ကိုလည်းကောင်း၊ အောက်မြန်မာပြည် ကိုယ်စားလှယ်လောင်း ၂ ဦး အဖြစ် ဦးကျော်မင်းအောင် (မွန်ပြည်နယ်) နှင့် ဦးဇော်ဝင်းကြီး (ပဲခူးတိုင်းဒေသကြီး)တို့ကို ရွေးချယ်တင်မြှောက်ခဲ့သည်။

မြန်မာနိုင်ငံဘောလုံးအဖွဲ့ချုပ် ကော်မတီ ၅ ရပ်ကို ဖွဲ့စည်းခဲ့ပြီး ဒိုင်ကော်မတီဥက္ကဌအဖြစ် ဦးဝင်းချို၊ ဖူဆယ်နှင့် သဲသောင်ပြင်ဘောလုံးကော်မတီဥက္ကဌ အဖြစ်
ဦးကြည်မင်းသိန်း၊  နည်းပြများကော်မတီဥက္ကဌ အဖြစ် ဦးဥာဏ်ဝင်း၊ ဘောလုံးသမားကော်မတီဥက္ကဌ အဖြစ် ဦးရဲညွန့်၊ အမျိုးသမီးဘောလုံးကော်မတီအဖြစ် ဥက္ကဌ ဒေါ်မြတ်မြတ်ဦးတို့ကို ရွေးချယ်တင်မြှောက်ခဲ့သည်။

ဘောလုံးအားကစားမှာ မြန်မာနိုင်ငံတစ်နိုင်ငံလုံး ချစ်မြတ်နိုးသော အားကစားဖြစ်ပြီး သက်ဆိုင်ရာဝန်ကြီးဌာန၊ မြန်မာနိုင်ငံဘောလုံးအဖွဲ့ချုပ်၊ ပရိသတ်များအားလုံး ပူးပေါင်းပါဝင်မှသာ အောင်မြင်မှုရနိုင်မည်ဖြစ်ပြီး ဘောလုံးလောကတိုးတက်ရေးအတွက် ကွင်းများ ရုံများ အဓိကလိုအပ်နေကြောင်း မြန်မာနိုင်ငံဘောလုံးအဖွဲ့ချုပ်ဥက္ကဌ ဦးဇော်ဇော်က ဆိုသည်။

မြန်မာနိုင်ငံဘောလုံးအဖွဲ့ချုပ် ကို ၁၉၄၇ ခုနှစ်က စတင်တည်ထောင်ခဲ့ပြီး  ၁၉၄၈ ခုနှစ်တွင် ကမ္ဘာ့ဘောလုံးအဖွဲ့ချုပ် အဖွဲ့ဝင်နိုင်ငံအဖြစ်လည်းကောင်း၊ ၁၉၅၄တွင် အာရှဘောလုံးအဖွဲ့ချုပ် အဖွဲ့ဝင်နိုင်ငံအဖြစ်လည်းကောင်း၊ ၁၉၉၆ ခုနှစ်တွင် အာဆီယံဘောလုံးအဖွဲ့ချုပ် အဖွဲ့ဝင်နိုင်ငံအဖြစ်လည်းကောင်း ၀င်ရောက်ခွင့်ရရှိခဲ့သည်။

comments

error: Content is protected !!