နည်းပြလောကသို့ဝင်မည်ဆိုပါက ဂျရတ်အတွက် သင့်တော်သည့်နေရာမှာ အမေရိကန်ဖြစ်ကြောင်း ဘရုစ်အရီနာ ဆို

ဂလက်ဆီအသင်းနှင့်အတူ လေ့ကျင့်ခန်းဆင်းနေသည့် ဂျရတ်

လီဗာပူးအသင်းခေါင်းဆောင်ဟောင်း စတီဗင်ဂျရတ်အနေဖြင့် မိခင်ကလပ်သို့ပြန်၍ နည်းပြအဖြစ်တာဝန်ထမ်းဆောင်ရန်ဆုံးဖြတ်ထားမှုအပေါ် လက်ရှိအယ်လ်အေဂလက်ဆီအသင်းနည်းပြ ဘရုစ်အရီနာက အမေရိကန်တွင် နည်းပြပညာဆည်းပူးခြင်းက ပိုမိုသင့်တော်သည်ဟု ပြောကြားသွားခဲ့သည်။

ဘရုစ်အရီနာက ”ကမ္ဘာပေါ်မှာ နည်းပြဖြစ်ဖို့ အကောင်းဆုံးသင်ကြားပေးနိုင်တဲ့ ရပ်ဝန်းက အမေရိကန်ပါပဲ”ဟု ဂျရတ်နှင့်ပတ်သက်၍ ၎င်း၏ယူဆချက်ကိုပြောကြားခဲ့သည်။

ထို့အပြင် ဘရုစ်အရီနာက အခြားနာမည်ကြီးအားကစားပြိုင်ပွဲများဖြစ်သော အမေရိကန်ဖွတ်ဘော၊ ဘေ့စ်ဘော၊ ဘက်စကတ်ဘောနှင့် ရေခဲပြင်ဟော်ကီတို့ကိုလည်း လေ့လာနိုင်ကြောင်းပြောကြားခဲ့ပြီး ”ပရီးမီးယားလိဂ်နဲ့ဝေးတဲ့နေရာ၊ ဘောလုံးလောကနဲ့ ၂၄ နာရီ ၁ ရက်လောက်ဝေးကွာလိုက်ပါ။ သူ့ရဲ့အရည်အချင်းတွေ ပိုပြီးကျယ်ပြန့်လာလိမ့်မယ်။ ကျွန်တော်တို့မှာ ထိပ်တန်းပရော်ဖက်ရှင်နယ်လိဂ်တွေမျိုးစုံရှိသလို နေ့ရက်တိုင်းမှာ အသင်းတွေဘယ်လိုဖြစ်မလဲဆိုတာကြည့်ရှုဖို့ စိတ်ဝင်စားစရာကောင်းပါတယ်။ နည်းပြတွေအနေနဲ့ မတူညီတဲ့ဖိအားတွေကို နေ့တိုင်းဖြေရှင်းနေကြရပါတယ်”ဟု ပြောကြားသွားခဲ့သည်။

ဂျရတ်မှာ ၎င်းထုတ်ဝေခဲ့သည့် စာအုပ်သစ်တွင် လီဗာပူးသို့ နည်းပြအဖြစ်ပြန်လည်ဝင်ရောက်ရန် ဆုံးဖြတ်ထားကြောင်းနှင့် အသင်းကစားဖော်ဟောင်းများဖြစ်သော ကာရေဂါနှင့် အလွန်ဆိုတို့ကို အဖွဲ့ဝင်အဖြစ်ခန့်အပ်မည်ဟု ရေးသားဖော်ပြထားသည်။